1. لينكس مجاني + مفتوح المصدر (اوبن سورس)، وبعيدا عن كلمة مفتوح المصدر دي الي ممكن نخوض ف معناها وتفاصيلها لاحقا، خلينا نركز على كلمة مجاني، وهنا مجاني بمعنى مجاني بجد.. لا بتضطر تفعله بكراك ولا بسيريال نمبر وﻻ بتستخدم اي طريقة ملتوية عشان تشغله على جهازك. وده طبعا معناه توفير لو انت من الناس الي عندها ضمير وبتشتري نسخ الويندوز.. او أمان وراحة بال لو انت من الناس الي بتستخدم كراك وبتتعب على ما تلاقيه او بتخاف يكون فيه فايروسات.
2. لينكس آمن ومستقر، طب ليه؟ ببساطة عشان الآلية الي شغال بيها مخلياه كدة. مفيش ملفات .exe .. مفيش حاجة لأي انتي فايروس، مفيش برنامج ممكن ينزل عالسيستم الا بموافقتك وباسوردك. ويكفي ان لو جهاز واحد بيستخدمه كذا شخص بتبقى الصلاحيات الي معاهم اقل بكتير من الصلاحيات الي مع مستخدمي جهاز عليه ويندوز، بالتالي لو حد فيهم ملفاته اتفيرست او اخترقت بيبقى الضرر اقل بكتير من الي ممكن يحصل ف ويندوز.
3. لينكس دايما جاهز! نزلت توزيعة من لينكس؟ مبروك.. انت غالبا معاك دلوقتي نظام عليه قارئ ملفات pdf ومشغل فيديو وصوت وسكانر و برنامج لضغط وقراءة الملفات المضغوطة وحزمة اوفيس وقارئ تعريفات (مع تعريفات نازلة ومتثبتة بالفعل).. ومتصفح مش ايدج وبرنامج لتحميل تورنت كمان! ده غير حاجات للمطورين زي ان بايثون (باصدار 2 و 3) نازلة افتراضيا هي و gcc .. والي هو كومبيلر للغات زي C/C++ و go و fortran .. وكل ده وانت لسة حالا منزل النسخة ومن غير ما تضرب ف النظام مفك حتى!
4. لينكس بارع ف انه يشتغل عالأجهزة القديمة بكفاءة. عندك جهاز قديم ومش قادر حتى تشغل ويندوز 7 عليه من غير تهنيج؟ جرب لينكس، واتفرج على اداء مختلف تماما وسلاسة تخليك تقدر تستخدم الجهاز تاني وتستفيد منه بدل منتا غالبا شايله فوق الدولاب دلوقتي لمجرد بس انه مبيشغلش ويندوز كويس. ولاحظ هنا اني بكلمك عن تشغيل لينكس بأحدث وأأمن اصدار، مش ويندوز 7 الي خلاص هينتهي الدعم ليه بداية السنة الجاية.
5. كل حاجة قابلة للتخصيص والتغيير، مش عاجبك ستايل النظام؟ غيره زي منتا عايز، مش عاجباك البرامج الافتراضية؟ تقدر تشيلها كلها، مش عاجباك اعدادات معينة ف النظام؟ وقفها عادي من غير ما تطلعلك رسالة خطأ انها "اجبارية" ولازم ترضى بيها .. كل حاجة ف النظام عبارة عن ملف تقدر تفتحه وتعدل فيه براحتك! حتى الاجهزة الي متوصلة بجهازك زي الماوس والكيبورد موجودين على جهازك كملفات ممكن تعدل فيهم عادي لو عندك الخبرة الكافية وعارف انت بتعمل ايه.
6. لينكس ف كل مكان، موبايلك الاندرويد مبني على لينكس، الرواتر الي عندك ف البيت غالبا شغال بلينكس، السيرفرات الي ماسكة اشهر المواقع الي بتزورها زي فيس بوك وامازون وجوجل شغالة بلينكس. النظام ده بيتم استخدماه تقريبا ف كل القطاعات. وفكرة بس انك تتعلمه وتعرف تتعامل معاه دي ف حد ذاتها مهارة ممكن تكتبها ف الCV وتلاقي شغل بسببها!
7. تحديثات اذكى، اكثر أدبا، واقل ازعاجا. يعني ببساطة مفيش حاجة اسمها انت لازم تعمل ريستارت دلوقتي حالا عشان في تحديث مهم نزل، ولا في حاجة اسمها انك تيجي تطفي الجهاز او تفتحه ف تلاقيه بيعمل تحديثات غصب عنك وتضطر تستناه لحد ما يخلص والا السيستم ممكن يقع لو طفيته بالقوة. ده غير ان التحديثات بتتعمل بمزاجك ووقت ما تحب ومش باشعارات مزعجة تطلعلك كل دقيقتين، وفوق كل ده تحديثات لكله مع بعضه، حاجة كدة مشابهة للي بيحصل ف موبايلك لما تدخل الplay store وتلاقي مجموعة برامج محتاجة تحديث ف تحدثها كلها مع بعضها. بعكس ويندوز الي بتضطر حرفيا انك تحدث كل برنامج فيه لوحده بعيدا عن تحديث النظام نفسه!
8. لينكس ممتاز للمبرمجين، بعيدا عن اننا ذكرنا ان لينكس بيجي جاهز افتراضيا انه يتعامل مع لغات زي بايثون وC .. لينكس بيدعم تقريبا كل لغات البرمجة الأساسية، ده غير انه بيوفر ادوات وبرامج كتير للمبرمجين تساعدهم فشغلهم وتوفرلهم بيئة عمل احسن، ناهيك عن الحاجات الي بتشتغل احسن على لينكس (زي docker) .. او الي مبتشتغلش اصلا الا على لينكس (زي ROS او kafka).
9. مفيش حاجة اسمها فورمات كل 6 شهور عشان الجهاز بقى بطيء، لينكس ممكن يشتغل معاك لسنين باستقرارية تامة وعدم الحاجة تماما لانك تشيله وتنزله تاني او تمسح من عليه حاجة.
10. لينكس يعني حضن.. ليكنس يعني مجتمع كبير. مهما كان لينكس جميل ف مفيش حاجة كاملة ومفيش نظام تشغيل بدون مشاكل، لكن الجميل هنا انه تأكد انه تقريبا 95% من المشاكل الي هتواجهها مع لينكس في ناس غيرك واجهوها بالفعل وحلوها.. وبشوية تدوير صح ف جوجل هتلاقي حل لمشكلتك بمنتهى البساطة، وهتلاقي ناس تساعدك وتعرفك ليه مشكلتك دي حصلت وايه حلها وازاي تطبقه.
ليست هناك تعليقات:
إرسال تعليق
اكتب تعليقك هنا